ஏழாயிரம் கோடியில் அயோத்தியில் இராமர் கோயில்: அறியவேண்டிய அனைத்தும் இதோ!

அயோத்தியில் சுமார் 7,700 கோடி ரூபாய் (இலங்கை மதிப்பில்) செலவில் கட்டப்பட்டுள்ள இராமர் கோயில் ‘பிராண பிரதிஷ்டை’ நிகழ்வு விமர்சையாக நடந்து முடிந்தது.

குழந்தை இராமரின் கண் கட்டு அவிழ்க்கப்பட்ட பின்னர் இந்திய பிரதமர் மோடி தீப ஆராதனை காட்டி வழிபட்டார்.

உத்தரபிரதேச மாநிலத்தில் சுமார் 76,000 மக்கள் வசிக்கும் பழங்கால நகரமான அயோத்தி, ஒரு முக்கியமான இந்து புனித யாத்திரை தலமாக இராமர் கோயில் கட்டப்பட்டுள்ளது. இதன் மூலம் ஒவ்வொரு ஆண்டும் இலட்சக்கணக்கானோர் வரும் இடமாக இது மாறும் எனக் குறிப்பிடப்படுகிறது.

ஐந்து அடி உயரத்தில், இடது கையில் வில்லும், வலது கையில் தடியும் ஏந்தியபடி; கிரீடம், வைர மற்றும் தங்க ஆபரணங்களுடன் வெள்ளை நிற பளிங்கு கற்களால் அலங்கரிக்கப்பட்ட கருவறையில் குழந்தை இராமர் பிரதிஷ்டை செய்யப்பட்டுள்ளார்.

இராமர் சிலை

அயோத்தியில் ராமர் கோயிலில் உள்ள பால இராமர் சிலையை உருவாக்கியது, கர்நாடகாவைச் சேர்ந்த பிரபல சிற்பி அருண் யோகிராஜ். இவர் மிக இளம் வயதிலேயே சிற்பம் செய்யும் பயணத்தை தொடங்கினார்.

இவரது குடும்பத்தின் ஐந்து தலைமுறையினர் மைசூரில் புகழ்பெற்ற சிற்பிகளாக இருந்துள்ளனர்.

அவரது தாத்தா பசவண்ணா சிற்பி கூட மைசூர் மன்னரால் பாராட்டப்பட்டதாக அறிக்கைகளில் குறிப்பிடப்பட்டுள்ளது. எம்பிஏ பட்டதாரியான அருண் யோகிராஜ், தனது பரம்பரையின் பாரம்பரியத்தை காப்பாற்ற நினைத்தவர் 2008ஆம் ஆண்டு முதல் சிற்பக்கலையில் ஈடுபடத் தொடங்கினார். டெல்லியில் உள்ள சுபாஷ் சந்திரபோஸின் 30 அடி சிலை, கேதார்நாத்தில் உள்ள ஆதி சங்கராச்சாரியாரின் 12 அடி சிலை மற்றும் மைசூரில் உள்ள 21 அடி உயர ஹனுமான் சிலை போன்ற பல குறிப்பிடத்தக்க சிற்பங்களை உருவாக்கியவர் அருண் யோகிராஜ் என்பது குறிப்பிடத்தக்கது.

சிலையின் சிறப்பம்சம்

அயோத்தியில் இராமர் கோயிலுக்குத் தயாராகிய ராமர் சிலை 51 அங்குல உயரத்தில், 5 வயது சிறுவனைப் போன்று செதுக்கப்பட்டுள்ளது. இராமர் கோயில் அறக்கட்டளையின் பொதுச் செயலாளர் சம்பத் ராய் கூறுகையில், பால், பிரசாதம் மற்றும் பிற பொருட்ளால் அபிஷேகம் செய்யப்படுவதால், அத்துடன் தொடர்பு கொண்ட பிறகும் சிலை சேதம் ஏற்படாமல் இருக்க கருங்கல்லில் செய்யப்பட்டுள்ளது,” என்றார்.

குறிப்பிடத்தக்க சிறப்பம்சங்கள்

6,931கோடி ரூபாய் நன்கொடை மூலம் திரட்டப்பட்ட நிதியில் கோயில் கட்டப்பட்டதாக மதிப்பிடப்பட்டுள்ளது.

2.7 ஏக்கர் நிலத்தில் இராமர் கோவில் கட்டப்பட்டப்பட்டுள்ளது. இராமர் கோயிலில் 392 தூண்கள் உள்ளன.

நிகழ்ச்சியில் பங்கேற்க அழைக்கப்பட்ட விருந்தினர்களின் எண்ணிக்கை 7,000, அவர்களில் 3,000 பேர் மிக முக்கிய பிரமுகர்கள்.

இராமர் கோவில் கட்டும் பணியில் எஃகு அல்லது இரும்பு பயன்பாடு முற்றிலும் தவிர்க்கப்பட்டுள்ளது. அதற்கு பதிலாக, பாரம்பரிய கட்டுமானப் பொருட்கள் அதன் கட்டுமானத்தில் பாரம்பரிய கட்டிட நடைமுறைகளுடன் பயன்படுத்தப்பட்டுள்ளன.

ராஜஸ்தானின் பரத்பூர் மாவட்டத்தைச் சேர்ந்த பன்சி பஹர்பூர் இளஞ்சிவப்பு மணற்கல் பிரதான கோயில் அமைப்பில் பயன்படுத்தப்பட்டுள்ளது. அடித்தளங்களில் கிரனைட் கற்கள் பயன்படுத்தப்பட்டுள்ளன.

வெள்ளை மக்ரானா மற்றும் வண்ண மார்பிள்ஸ் பதிக்கும் பணிக்கு பயன்படுத்தப்பட்டுள்ளது.

கோவிலின் கதவுகள் கட்டுவதற்கு தேக்குமரம் பயன்படுத்தப்பட்டுள்ளது. அதன் கட்டுமானத்தில் “ஸ்ரீ ராம்” என்று பொறிக்கப்பட்ட சிறப்பு செங்கற்கள் பயன்படுத்தப்பட்டுள்ளன. ராம் ஷிலாஸ் என்று பெயரிடப்பட்ட இந்த செங்கற்கள், இராமர் சேதுவின் கட்டுமானத்தில் பயன்படுத்தப்பட்ட கற்களுடன் இணையாக வரைந்து, நவீன கைவினைத்திறனை பண்டைய அடையாளங்களுடன் பின்னிப் பிணைந்துள்ளது.

அத்துடன் ஷாலிகிராம் பாறை, செப்பு தகடுகள், தங்கம் மற்றும் அஷ்டதாது ஆகியவை பயன்படுத்தப்பட்டுள்ளன.

கோயில் அழகியல்

பிரதான கோவில் முக்கிய கோவில் நாகரா பாணியில் கட்டப்பட்டுள்ளது. இராமர் கோயிலுக்கான அசல் வடிவமைப்பு 1988ஆம் ஆண்டு அகமதாபாத்தைச் சேர்ந்த சோம்புரா குடும்பத்தால் உருவாக்கப்பட்டது.

இருப்பினும், 2020ஆம் ஆண்டில், பழைய வடிவமைப்பு வாஸ்து சாஸ்திரம் மற்றும் ஷில்பா சாஸ்திரத்தின்படி மாற்றியமைக்கப்பட்டது.

பிரதான கோயில் கட்டிடம் 3 தளங்களை கொண்டது. கோவிலின் தரை தளம் இராமரின் பிறப்பு மற்றும் குழந்தைப் பருவத்தை விபரிக்கும் வகையில் வடிவமைக்கப்பட்டுள்ளது.

முதல் தளம் இராமரின் தர்பார் போன்று வடிவமைக்கப்பட்டுள்ளது.

நிருத்ய மண்டபம், ரங் மண்டபம், சபா மண்டபம், பிரார்த்தனை மற்றும் கீர்த்தனை மண்டபங்கள் என மொத்தம் ஐந்து மண்டபங்கள் அமைக்கப்பட்டுள்ளன.

கோயிலில் மொத்தம் 44 கதவுகள் உள்ளன, அவற்றில் சில 100 கிலோ தங்கத்தால் பூசப்பட்டுள்ளன.

கோயிலின் பிரதான நுழைவாயில் சிங் துவார் என்று அழைக்கப்படுகிறது.

இந்த நுழைவாயிலில் இராமாயணத்தின் முக்கிய கதாபாத்திரங்களின் மார்பளவு சிலைகள் இடம் பெற்றுள்ளன. கோவில் வளாகம் பார்கோட்டா எனப்படும் செவ்வக வடிவ சுவரால் சூழப்பட்டுள்ளது.

இந்த சுவரின் மொத்த நீளம் 732 மீட்டர் மற்றும் அதன் அகலம் 14 அடி.

கோயிலின் நான்கு மூலைகளிலும் சூரிய தேவன், பார்வதி தேவி, கணபதி, சிவபெருமானுக்கு ஆலயங்கள் அமைக்கப்பட்டுள்ளன.

கோயில் வளாகத்தின் வடக்குப் பகுதியில் அன்னபூரணி மாதா கோயிலும், தெற்குப் புறத்தில் அனுமன் கோயிலும் உள்ளன. கோயிலுக்கு அருகில் சீதா கூப் என்ற வரலாற்றுச் சிறப்புமிக்க கிணறு உள்ளது.

மகரிஷி வசிஷ்டர், மகரிஷி வால்மீகி, மகரிஷி விஸ்வாமித்ரா, மகரிஷி அகஸ்தியர், நிஷாத் ராஜ், தேவி அஹில்யா மற்றும் மாதா ஷப்ரி ஆகியோருக்கு அர்ப்பணிக்கப்பட்ட கோயில்களும் உள்ளன.

கழிவுநீர் சுத்திகரிப்பு நிலையம் நீர் சுத்திகரிப்பு நிலையம், தீயணைப்பு நிலையம் மின் நிலையம் , பக்தர்களுக்கு வைத்திய வசதிகள், 25,000 பேர் திறன் கொண்ட யாத்ரீகர்கள் வசதி மையம், குளிக்கும் பகுதி, கழிவறைகள், திறந்த குழாய்கள் போன்றவற்றைக் கொண்ட தனித் தொகுதிகள் அமைக்கப்பட்டுள்ளன.

கோயில் வளாகத்தில் இராமர் மற்றும் இராமாயணம் தொடர்பான கலைப்பொருட்கள் காட்சிப்படுத்தும் அருங்காட்சியகம் உள்ளது.

நேபாளம் கண்டகி ஆற்றில் இருந்து கொண்டு வரப்பட்ட 60 மில்லியன் ஆண்டுகள் பழமையான சாலிகிராம் பாறைகளால் சிலைகள் உருவாக்கப்பட்டுள்ளன.

2100 கிலோ எடையுள்ள மணியானது அஷ்டதாத்து (தங்கம், வெள்ளி, தாமிரம், துத்தநாகம், ஈயம், தகரம், இரும்பு மற்றும் பாதரசம்) ஆகியவற்றால் ஆனது. மணியின் சத்தம் 15 கிமீ தூரம் வரை கேட்கும் எனக் கூறப்படுகிறது. (yourstory with some inputs)