வெரிடே ரிசர்ச்சின் (Verité Research) சுயாதீனமான பகுப்பாய்விற்கு அமைய, இலங்கை தனது சர்வதேச நாணய நிதியத்தின் (IMF) பிணை எடுப்புத் திட்டத்தின் கீழ் தனது ஆரம்பக் கடப்பாடுகளில் பெரும்பாலானவற்றை செயற்படுத்தியுள்ளபோதிலும், நிர்வாகம் மற்றும் வெளிப்படைத் தன்மை சீர்திருத்தங்களில் தாமதங்கள் தொடர்கின்றன.
இலங்கை பல தசாப்தங்களில் அதன் மோசமான பொருளாதார நெருக்கடியுடன் போராடி, மார்ச் 2023 இல் IMF’இடமிருந்து 2.9 பில்லியன் டொலர் கடனைப் பெற்றது.
விரிவாக்கப்பட்ட நிதி வசதி (EFF) திட்டத்தின் கீழ் இலங்கையின் முன்னேற்றத்தை அதன் இணையதளத்தின் “IMF Tracker” மூலம் கண்காணிக்கும் Verité Research, 2023 நவம்பர் இறுதிக்குள் நிறைவேற்றவேண்டிய 73 பொறுப்புகளில் 60 சில தாமதங்களுடன் நிறைவேற்றப்பட்டதாக தெரிவிக்கிறது.
எவ்வாறாயினும், முக்கியமான சீர்திருத்தங்களுக்கான இலங்கையின் அர்ப்பணிப்பு குறித்த கவலைகளை எழுப்பும் வகையில், 13 வாக்குறுதிகள் நிறைவேற்றப்படாமல் உள்ளதாக குறிப்பிடப்பட்டுள்ளது.
இவற்றில் ஐந்து மீளமுடியாமல் தவறவிடப்பட்டுள்ளதால் முன்னோக்கி கொண்டு செல்ல முடியாது. அதேநேரத்தில் எட்டு அடுத்த IMF மதிப்பாய்விற்கு வழிவகுக்கும் திட்டத்தின் இரண்டாம் கட்டத்திற்கு ஒத்திவைக்கப்பட்டுள்ளன.
IMF, நவம்பர் மாதத்திற்குப் பின்னர் ஆரம்பத்தில் நிர்ணயிக்கப்பட்ட மேலதிக 27 பொறுப்புகளுக்கான கால வரையறையை மாற்றியமைத்துள்ளது. மேலும், இலங்கை மற்றும் சர்வதேச நாணய நிதியம் திட்டத்தில் 75 புதிய அர்ப்பணிப்புகள் இணைக்கப்பட்டுள்ளன.
இதன் விளைவாக, EFF இன் இரண்டாம் கட்டம் 110 உறுதிப்பாடுகளுடன் சமநிலையில் காணப்படுகிறது.
குறிப்பிடத்தக்க வகையில், நான்கு குறிப்பிட்ட நிர்வாகம் மற்றும் வெளிப்படைத்தன்மை தொடர்பான பொறுப்புகள் நிறைவேற்றப்படாமல் உள்ளன.
இதில் பொது கொள்முதல் மற்றும் வரி விலக்குகளுக்கான இணைய வெளிப்படைத் தன்மை தளத்தை ஆரம்பித்தல் மற்றும் ஊழல் எதிர்ப்பு ஆணைக்குழுவின் பணிப்பாளர்களுக்கான தகுதி அடிப்படையிலான தெரிவு செயன்முறையை நிறுவுதல் ஆகியவை உள்ளங்கும்.